/ tennis / "Handleddet kjem seg fint. Det var ein liten betennelse, og han er klar for start i Stockholm"

Noregs tennisstjerne Casper Ruud måtte trekkja seg med ein handleddsskade i Shanghai. I Stockholm er han tilbake igjen – og får sjeldan selskap.

– Handleddet kjem seg fint. Det var ein liten betennelse, og han er klar for start i Stockholm, opplyser Ruuds manager Tina Falster til NTB.

At Casper Ruud speler ei ATP-turnering, er ikkje ei spesielt sjeldan storhending. Det har han gjort stort sett kvar månad mellom januar og november dei siste sju åra. Det spesielle er at også Nicolai Budkov Kjær (19) er direkte kvalifisert til hovudturneringa.

Nicolai Budkov Kjær har storspelt i år og er på veg mot 100 på verdsrankinga. Foto: Lise Åserud / NTB / NPK

At to nordmenn er direkte kvalifiserte til ei hovudturnering på ATP-nivå har aldri skjedd tidlegare, etter det NTB kan sjå. Ruud og Viktor Durasovic spelte saman i Stockholm-turneringa for fire år sidan, men då hadde Durasovic kvalifisert seg inn.

I 1999 og 2001 spelte Christian Ruud og Jan Frode Andersen saman i høvesvis Miami Masters og Roland-Garros, men ved begge høva var Andersen inne via kvalifisering.

– På veg mot topp 100

Denne gongen er Kjær, som gjennom godt spel har fått eit wildcard, direktekvalifisert. Nordmannen er i kjempeform og vann nyleg sin fjerde tittel på challenger-nivå, nivået under ATP. 19-åringen er oppe på 137.-plass på verdsrankinga.

Det er berre tre spelarar under 20 år som er rangerte høgare enn nordmannen. Denne veka speler Kjær ein challenger-turnering i Frankrike.

– Han har spelt kjempegodt i det siste. Han er på veg mot topp 100, seier tennisekspert og -kommentator Christer Francke til NTB.

– Han speler eit ganske stort spel og er veldig offensiv. Sånn sett speler han litt annleis enn Casper. Det er forskjell på det nivået han speler på, men han har likevel slått mange spelarar som har vore topp 100 og i nærleiken der, seier han.

Variabel Ruud

Turneringa i Stockholm startar måndag med 28 spelarar i hovudturneringa. Tommy Paul frå USA er blant dei som stiller. Amerikanaren vann turneringa i fjor.

For Casper Ruud har det vore mykje opp og ned denne sesongen. Det største høgdepunktet kom då han vann Master1000-turneringa i Madrid, den største tittelen i karrieren.

Noregs klart beste tennisspelar har hamna bakpå i kampen om å nå ATP-sluttspelet. Der deltek dei åtte spelarane som har teke flest rankingpoeng gjennom sesongen. Ruud ligg akkurat no på 11.-plass på den lista.

– Spørsmålet er om kroppen held. Han har hatt problem med kneet tidlegare og no handleddet. Han speler eigentleg veldig bra, men det er nokon skadar som har stoppa han litt, seier Francke.