/ aktuelt / Tusenvis stod saman for solstrålen Tamima Nibras Juhar – og for eit tryggare og meir inkluderande samfunn

Søndag 31. august vart Youngstorget i Oslo fylt av gule roser, gule klede og 30 000 menneske som kom for å heidra Tamima Nibras Juhar og ta avstand frå hat og rasisme. Det gule rosetoget og minnemarkeringa vart arrangert av Antirasistisk Senter i tett samarbeid med familien og venene til Tamima, som vart drepen medan ho var på jobb ved eit barnevernstiltak. 

Tamima var berre 34 år gammal då ho vart offer for eit brutalt drap. Den mistenkte gjerningspersonen er 18 år gamle Djordje Wilms med kjende høgreekstreme haldningar, og han er no sikta for terror.

Tragedien har rysta både lokalsamfunnet og landet, og markeringa på Youngstorget vart eit kraftfullt uttrykk for sorg, solidaritet og motstand. 

Statsminister Jonas Gahr Støre var blant dei som heldt appell under markeringa. Han uttrykte djup medkjensle med familien og understreka at samfunnet må ta trusselen frå ekstremisme og rasisme på alvor. Også representantar frå religiøse miljø, fagforeiningar og sivilsamfunnet deltok med ord til ettertanke. 

Oslo farga gult

Gulfargen var sentralt i markeringa – det var Tamima sin favorittfarge, og ho vart omtalt som ei solstråle av dei som kjende henne. Oslo by vart oppmoda til å ta eigarskap til gulfargen, og mange butikkar og restaurantar deltok ved å farge byromma gule. Det handla om å ta byen tilbake, og å visa at Tamima sitt liv og lys lever vidare i fellesskapet.

Minnemarkeringa var ikkje politisk, men eit rom for sorg og samhald. Familie og vener ønskte å løfta fram Tamima si historie – ho hadde sjølv fått hjelp frå barnevernet, og vart seinare ein viktig ressurs i systemet. «Ho var åleine på jobb, men ikkje åleine i verda», sa ein av dei næraste pårørande. 

Stå saman mot hatet

Antirasistisk Senter har vore i tett kontakt med familien sidan hendinga, og har understreka at pårørande sine premiss har vore styrande for markeringa. I ei tid der mange kjenner på uro og frykt, har senteret oppmoda samfunnet til å stå saman mot hatet. «Ingen skal måtte vera redde for å gå på jobb eller delta i fellesskapet», heiter det i ei uttale frå senteret.  

Markeringa vart eit sterkt vitnesbyrd om kva Tamima betydde for så mange, og om kor viktig det er å kjempa mot rasisme og ekstremisme. Med gule roser i hendene og varme ord i hjarta, stod tusenvis saman – for Tamima, og for eit tryggare og meir inkluderande samfunn.

Tamima Nibras Juhar vart gravlagt fredag 29. august. – Vi takkar så mykje for den støtta de viser oss. Tamima tilhøyrde oss, men nå tilhøyrer ho heile Norge, uttalte familien etter gravferda.