/ natur / "Husdyra lid unødig og det er ei belastning også for bøndene."

Jan Inge Fardal

Jerven sine herjingar i saueflokkane i Luster har vore tema i Stortinget. Klima- og miljøministeren lovar å vurdere ekstraordinære tiltak.

Det er representanten Erling Sande (Sp) som har stilt spørsmål om kva statsråden vil gjere for å sikra at jerv som kjem inn i område der beitedyra har prioritet, vert tatt ut og at det skjer raskt slik at det ikkje vert store tap av beitedyr.

Klima- og miljøminister Andreas Bjelland Eriksen (Ap) opnar for å vurdere ekstraordinære tiltak mot jerven i Luster. Foto: Jonas Fæste Laksekjøn / NTB / NPK

Bakgrunnen for spørsmålet er at i Luster i Sogn har jerven i sommar gjort stor skade på saueflokkar på beite i fjellet. Sande peika i det skriftlege spørsmålet på at desse sauene beitar i område som er prioritert for beiting og at tanken bak rovdyrforvaltninga er at i desse områda skal rovdyr, som gjer skade på husdyr takast ut raskt.

– Likevel ser me at det ofte tek tid før nødvendige fellingsløyve vert gjevne og uttak skjer. Det fører til at husdyra lid unødig og det er ei belastning også for bøndene som driv i området. I tillegg svekkjer det tilliten til rovdyrforvaltninga, skriv Sande i spørsmålet sitt til klima- og miljøvernminister Andreas Bjelland-Eriksen.

Kjend med tapet

I svaret sitt datert 7.oktober vedgår statsråden at han er kjend med at det er påvist tap av sau grunna jerv i Luster, og at det per 30. september var registrert ni slike tilfelle. Han legg til at sidan dyra som blir funne att normalt berre utgjer ein mindre del av dei totale tapa, er det reelle tapet sannsynlegvis større.

«I område prioritert til beitedyr er det låg terskel for å tillata skadefelling ved akutte skadesituasjonar i beitesesongen, og slike søknader blir behandla raskt. Ifølgje Miljøvedtaksregisteret er det likevel ikkje registrert nokon søknader om skadefelling av jerv i Luster denne beitesesongen», skriv statsråden.

Han viser vidare til at når det gjeld bestandsregulering av jerv er det i tråd med rovviltforliket lisensfelling som skal vera hovudverkemiddelet, og at det vart opna for lisensfelling av inntil 8 jerv i region 1 (Vestland, Rogaland og tidlegare Vest-Agder) frå 20. august i år, og lisensfellingsperioden varer til 15. februar 2026.

Stortingsrepresentant Erling Sande (Sp) har spurt kva statsråden vil gjera med jerveproblema i Luster. Foto: Håkon Mosvold Larsen / NTB / NPK

Lite effektiv

«Så langt er det likevel ikkje registrert uttak av jerv under inneverande lisensfellingsperiode. Erfaringsvis resulterer lisensfelling i liten grad i felling av jerv i region 1, og moglegheiter for å gjera tiltak som kan gi auka innsats i lisensfellinga er noko eg mellom anna har teke opp med den regionale rovviltnemnda», skriv statsråden og legg til at grunna lite effektiv lisensfelling har Miljødirektoratet ei løpande merksemd på behovet for ekstraordinære uttak, og i både Luster og andre delar av region 1 blir omtrent alle uttak av jerv utført av Statens naturoppsyn.

Ifølge statsråden er det dei siste 20 åra berre felt 4 jervar ved lisensfelling.

«Luster og områda rundt er attraktive område for jerv, og det skjer regelmessig innvandring av nye individ til desse områda. Det er krevjande å fella jerv, særleg i sommarhalvåret. Forvaltninga har likevel stor merksemd på desse områda, og behovet for ekstraordinære uttak vil bli vurdert òg denne vinteren og våren, i forkant av neste beitesesong», heiter det i svaret frå Bjelland-Eriksen.

(©NPK)